د خوړو نړیوال پروګرام د افغانستان د برخې مشر ویلي، چې افغانستان ته د خوراکي توکو د انتقال لګښت درې برابره لوړ شوی. جان ايليیف ویلي چې مهم خوراکي توکي لکه تغذیوي بسکېټ او نور غذایي مواد اوس له دوبۍ نه د اوو هېوادونو له لارې په ځمکنیو بدیلو لارو کابل ته لیږدول کیږي.
د ملګرو ملتونو د خوړو نړیوال پروګرام (WFP) د افغانستان د دفتر مشر جان ايليیف ویلي چې افغانستان ته د خوراکي توکو د لېږد لګښت درې برابره لوړ شوی، ځکه کابل سمندر ته نېغ لاسرسی نه لري او د اکمالاتو ټول مسیرونه له اوږدو او ګران بیه ترانسپورتي لارو تېرېږي.
د هغه په وینا، د هرمز تنګي د سمندري لارې د ګډوډېدو له امله د بشري مرستو بهیر په جدي ډول اغېزمن شوی، چې له کبله یې نه یوازې د مرستو د رسېدو وخت زیات شوی، بلکې لګښتونه هم په بې ساري ډول لوړ شوي دي.
د انډیپنډنټ ورځپاڼې د رپوټ له مخې، هغه زیاته کړې چې مهم خوراکي توکي لکه تغذیوي بسکټونه او نور اړین توکي چې ډېری له دوبۍ څخه افغانستان ته لېږدول کېږي، اوس د خلیج د سمندري لارې د تړل کېدو له امله د اوو هېوادونو له لارې په بدیلو ځمکنیو مسیرونو لېږدول کیږي.
دغه بدیلې لارې د مرستو رسونې وخت شاوخوا درې اونۍ اوږدوي او د ترانسپورت لګښتونه یې په ځینو مواردو کې څو برابره ډېر کړي دي.
په افغانستان کې د دغه وضعیت اغېز لا زیات محسوس دی، ځکه کابل له وړاندې د خوراکي ناامنۍ له جدي ناورین سره مخ دی.
مرستندویه ادارې د لوژستیکي فشار له امله له جدي محدودیتونو سره مخ شوې او د مرستو چټکتیا او ظرفیت نور هم کم شوی دی.
راپور همدارنګه یادونه کوي چې د تیلو د نړیوالو بیو لوړېدو دغه ستونزې لا نورې سختې کړې دي او د مرستو رسونه یې لا ګرانه او پیچلې کړې ده.
