په فراه کې د طالبانو رسنیز دفتر خبر ورکړی، چې په دغه ولایت کې پر کډوالو تازه جوړ شوي ۱۰۸ کورونه وېشل شوي دي. د یاد دفتر د خبرپاڼې له مخې؛ دغه کورونه د ۵،۵ مېلیونه امریکايي ډالرو په لګښت د قطر الغرافه موسسې په همکارۍ جوړ شوي دي.
په خبرپاڼه کې راغلي، دغه کورونه هغو کډوالو ته ورکړل شوي چې له ایران او پاکستان نه یې تر ستنېدو وروسته په هېواد کې د سرپناه ستونزه درلوده.
په فراه کې د طالبانو مرستیال والي مولوي رحیم الله محمود د کورونو د سپارلو په موخه یوې جوړې شوې غونډې ته ویلي، په نږدې راتلونکي کې د کډوالو او بېرته راستنېدونکو لپاره د فراه په محمداباد سیمه کې به نور کورونه هم پر تازه راستانه شویو کورنیو ووېشل شي.
نوموړي له همکارو موسسو غوښتي، چې د کډوالو لپاره د لا زیاتو اسانتیاوو برابرولو په برخه کې اغېزمن ګامونه واخلي.
د طالب چارواکو په وینا؛ له پنځو کلونو راهیسې څه باندې ۴نیم مېلیونه افغان کډوال د سیمې له هېوادونو په ځانګړې توګه له پاکستان او ایران نه بېرته افغانستان ته ستانه شوي دي؛ خو طالبانو په دې موده کې یوازې پر څه باندې ۱۰زره کورنیو د استوګنې نمرې وېشلې، چې د راستنېدونکو پرتله خورا کمې دي.
سره له دې چې طالبانو افغانستان ته د بېرته ستنېدونکو کډوالو لپاره په ځینو ولایتونو کې د اوسېدو ځانګړي پنډغالي او ښارګوټي جوړ کړي؛ خو تازه ستانه شوي کډوال له بېکارۍ او د سرپناه له نشتوالي شکایت کوي او ځینې کسان هڅه کوي بېرته پر ناقانونه لارو له هېواده ووځي.
