د بلوچستان ایالت کیچ تربت ولسوالۍ اړوند دشت بشولي سیمه کې پر یوه مساپر وړونکي موټر د پاکستاني ځواکونو په ډزو کې دوه افغانان وژل شوي او دوه نور ټپیان دي. د تربت دولتي روغتون مشر ډاکټر وحید بلیدي افغانستان انټرنشنل پښتو ته ویلي، چې په ټپیانو کې یوه ښځه هم شامله ده.
بل لور ته د پاکستان امنیتي ځواکونه وايي، چې دوی یوه شکمن موټر ته درېدو اشاره وکړه؛ خو موټر چلوونکي موټر ونه دراوه او له همدې امله دوی اړ شول، چې په موټر ډزې وکړي. د یادونې وړ ده، چې په موټر کې سپاره افغان وګړي په ناقانونه توګه ایران ته روان وو.
تر دې وړاندې هم د بلوچستان په پنجګور ولسوالۍ کې د ډزو له امله دوه افغان ښځې وژل شوې وې او درې کسان ټپیان وو. ځایي چارواکو هغه مهال ویلي و، دغه وژل شویو افغان مېرمنو په قاچاقي لاره پاکستان ته د ننوتو هڅه کوله.
د پنجګور په پروم سیمه کې په یاده پېښه کې هم د پاکستان امنیتي ځواکونو د دوو موټرونو د درېدو هڅه کړې وه؛ خو یو موټر د تېښتې هڅه وکړه او امنیتي ځواکونو پرې ډزې وکړې. په دغه ډزو کې دوه افغان ښځې ووژل شوې او درې نور ټپیان شول.
د لارو تړل پاتې کېدو او د ویزو د ورکړې لړۍ سختېدو له امله افغانان اړ اېستل کېږي، چې پر ناقانونه لارو تګراتګ وکړي؛ خو ډېری وخت له ورته وژونکو پېښو سره مخ کېږي.
