په پاکستان کې القاعده شبکې ته د جلب او جذب په تور نيول شوی يوټيوبر زندان ته ولېږدول شو
د پاکستان د پنجاب ایالت په لاهور ښار کې القاعده شبکې ته د جلب او جذب په تور نيول شوي «يوټيوبر» محمد سعد بن رياض زندان ته لېږدول شوی دی. هغه مېرمن ويلي، دوی به د سعد پر ضد «جعلي او درغلیزه قضیه تر معقول پای رسوي».
د سعد بن رياض مېرمن عايشه قيوم په اېکس خواله رسنۍ کې لیکلي، د خاوند کړاو یې باید د هر هغه چا لپاره د هیلو سرچینه شي چې د «نظام له خوا د ناوړه چلند سره مخ شوی».
سعد بن رياض د دوشنبې په ورځ په لاهور کې يوې ځايي محکمې ته وړاندې کړل شوی او محکمې بيا د ۱۴ ورځو لپاره زندان ته لېږلی چې په توقيف کې وساتل شي.
لاهور کې د ترهګرۍ پرضد عمليات کوونکو پوليسو «سي ټي ډي» دغه يوټيوبر په ۲۷م اپرېل لاهور کې په مال روډ د لټون په عملياتو کې نيولی و.
سي ټي ډي د ده پرضد ثبت کړې قضیه کې ادعا کړې وه، چې له سرچينې څخه ورته معلومات ترلاسه شوي و، چې دغه تن د القاعده شبکې لپاره «خلک جذبول او منع شوي مواد ورسره وو».
چارواکو ادعا کړې وه، د عملیاتو پر مهال د هغه له قبضې څخه د اسامه بن لادن په اړه د کتاب پنځه کاپۍ او د القاعده د غړیتوب یوه کارت هم ترلاسه شوی و.
