جنوبي وزیرستان کې ځانمرګی برید او نښته؛ دوه ملکي وګړي وژل شوي او ۲۰ نور ټپیان دي
د خيبرپښتونخوا د جنوبي وزيرستان ولسوالۍ په برمل کې د پاکستاني پوځ په يوه امنیتي پوسته ځانمرګی برید او وسله واله نښته شوې، چې لږ تر لږه دوه ملکي وګړی په کې وژل شوي او د پنځه امنيتي سرتېرو په ګډون ۲۰ تنه ټپیان شوي دي.
د جنوبي وزيرستان پوليسو افغانستان انټرنشنل - پښتو ته تاييد کړې، چېد دوشنبې په ماښام د کوز جنوبي وزیرستان برمل په اعظم ورسک سيمه کې په پوځي پوسته دا ځانمرګی بريد ترسره شوی دی.
پولیس چارواکو په پېښه کې مرګ ژوبله تايید کړې او ویلي یې دي چې د ځانمرګي بريد وروسته د وسله والو او امنيتي ځواکونو ترمنځ د ډزو تبادله هم شوې ده.
دوی وویل، د بريد په ترڅ کې د پوستې ترڅنګ د ځايي خلکو کورنو ته هم زيان اوښتی، او ټپيان روغتونونو ته لېږدول شوي خو د مخابراتي ستونزو له امله ورته کافي معلومات نه دي رسېدلي.
د پاکستان ځينې رسنيو د امنيتي چارواکو له قوله ويلي، ځانمرګی بريد یې شنډ کړی دی. خو د پاکستان پوځ د دغه پېښې په اړه تراوسه په رسمي توګه څه نه دي ویلي.
