په کندهار کې د سوداګرۍ او پانګونې خونې مشر عبدالاحد صدیقي خبریالانو ته ویلي، چې د چین د درېیو ایالاتونو له سوداګرۍ خونو سره یې د صادراتو او وارداتو د اسانتیا او د سوداګرۍ کچې د لوړوالي په موخه درې هوکړهلیکونه لاسلیک کړي.
د کندهار سوداګرو یاد هوکړهلیکونه چین ته د سفر پرمهال لاسلیک کړي. حاجي عبدالاحد صدیقي زیاتوي، چې په دغه هوکړه لیکونو کې د صادراتو او وارداتو توازن په پام کې نیول شامل دي.
نوموړی زیاتوي، چې موخه یې د دواړو هېوادونو ترمنځ د سوداګرۍ کچې لوړوالی، د ترانزيټي ستونزو حل، افغان سوداګرو ته د اسانتیاوو برابرول او د اقتصادي اړیکو پیاوړتیا ده. د صدیقي په خبره؛ یاد هوکړهلیکونه د چین د هغو ښارونو له سوداګرۍ خونو سره شوي، چې له افغانستان نه په پراخه کچه توکي ورته صادرېږي.
د یادې خونې د بورډ غړي وايي، له همدې هوکړهلیکونو څخه یو یې د «یوو» ښار د سوداګرۍ خونې سره درې کلنه هوکړه ده چې افغان سوداګر ۶۰ سلنه صادارت دغه ښار ته کوي. د کندهار سوداګر وايي، که اسانتیاوې ورته برابرې شي کولای شي تر ډېره په کور دننه خپلې اړتیاوې پوره او ځان بساینې ته ورسېږي.
