د طالبانو تر واک لاندې د برېښنا شرکت وايي، وروستیو ورښتونو په هېواد کې د اوبو بندونه ډک کړي او په ټول هېواد کې د برېښنا د وېش کچه د پام وړ لوړه شوې ده. بل خوا خلک بیا غوښتنه کوي، چې د یو کیلو واټ بیه دې له دوه نیمو افغانیو را کمه شي.
د طالبانو د برېښنا شرکت ویاند محمدصادق حق پرست وایي، چې دامهال په ډېرو سیمو کې ۲۴ ساعته برېښنايي چوپړتیاوې وړاندې کېږي او د برېښنا تولید او غوښتنه له ۹۰ تر سل سلنې لوړه شوې ده.
نوموړي زیاته کړې، یاد شرکت د شبکو د پراختیا لپاره نوې برېښنايي شبکې فعاله کړې چې د دوامداره برېښنا د لېږد وړتیا لري. نوموړي زیاته کړې: «ورښتونو بندونه ډک کړي، له هغو بندونو څخه چې وړاندې یې برېښنا کچه کمه وه اوس لوړه شوې ده. مثال: د نغلو او سروبي ماهیپر بند پخوا د وچکالۍ له کبله د ۳۰ څخه تر ۳۵ مېګاواټه برېښنا تولیدوله اوس ۱۶۹ مېګاواټه برېښنا راکوي».
په ورته وخت کې یوشمېر کورنۍ د برېښنا د بیلونو له لوړې بیې شکایت کوي. د کندهار یو اوسېدونکی حاجي امینالله وايي، چې تر ۳۰۰ مېګاواټه پورې د یو مېګاواټ بیه دوه نیمې افغانۍ ده. هغه زیاته کړې:« د یو مېګاواټ بیه دوه نیمې افغانۍ ده، د ډېرو د وس څخه وتلې خبره ده، که چېرې په دوو میاشتو کې د تحویلۍ بیل رانغی بیا نو دوه برابره ډېرېږي».
دوی غوښتنه کوي، چې د برېښنا په بېو کې دې کموالی راشي. سوداګر، هټۍوال او د هوټلونو څښتنان هم له طالبانو څخه د دایمي برېښنا غوښتنه لري. عبدالجبار چې په کندهار کې هوټل لري وايي: «د برېښنا ستونزه دایمې نهده حل شوې، کله چې هوا ډېره یخه یا ګرمه وي، برېښنا ډېره کمه وي او بیلونه زیات. باید برېښنا د ډېروالي سره د بیلونو بیې هم کمې شي».
په افغانستان کې د برېښنا سکتور له کلونو راهیسې له جدي ستونزو سره مخ دی. افغانستان لاهم په پراخه کچه پر وارداتي برېښنا تکیه لري، چې ډېره برخه یې له ازبکستان، تاجکستان، ترکمنستان او ایران نه واردېږي.
د کورنیو سرچینو محدود تولید، زړې شبکې، تخنیکي ستونزې او د برېښنا ضایعات هم هغه عوامل دي، چې د برېښنا لګښت لوړوي. سربېره پر دې د برېښنا د وېش سیستم کې اداري ستونزې او د عوایدو راټولولو کمزورتیا هم د مالي فشار لامل ګرځي، چې په پایله کې یې بیلونه زیاتېږي.
