مسعود پزشکیان: د امریکا یو اړخیزو غوښتنو ته به تسلیم نه شو
د ایران ولسمشر مسعود پزشکیان ویلي، چې ایران به د امریکا د یو اړخیزو غوښتنو پر وړاندې تسلیم نه شي. نوموړي دا څرګندونې د عراق له ټاکل شوي صدراعظم محمد شیاع السودانی سره په ټلیفوني خبرو کې کړې دي.
پزشکیان ویلي: «زموږ ستونزه دا ده چې امریکا له یوې خوا پر هېواد د اعظمي فشار سیاست تعقیبوي، او له بلې خوا تمه لري چې ایران د مذاکراتو مېز ته کښېني او په پای کې د دوی یو اړخیزو غوښتنو ته تسلیم شي.»
هغه زیاته کړې: «دا ډول معادله ناشونې او ناممکنه ده.»
د ایران او امریکا ترمنځ اړیکې لا هم له کړکېچ سره مخ دي. دواړه لوري د فشار او ډیپلوماسۍ ترمنځ متضاد سیاستونه تعقیبوي، چې له امله یې د خبرو اترو راتلونکی لا هم نامعلوم ښکاري.
