د طالبانو روغتیا وزارت خبر ورکړی، چې د یاد وزارت د خوړو او درملو مرستیال مولوي حمدالله زاهد او مل پلاوي یې افغان سوداګرو ته د درملو واردولو په برخه کې د اسانتیاوو رامنځته کولو په موخه روسیې هېواد ته سفر کړی.
د یاد وزارت په خبرپاڼه کې راغلي، چې د دغه سفر موخه د افغانستان او روسیې ترمنځ د دوه اړخیزو اړیکو پیاوړتیا او ستراتیژیکو همکاریو پراختیا، د خوړو او درملو تامین، تنظیم او په ځانګړې توګه افغان سوداګرو ته د معیاري، خوندي او د باور وړ درملو او خوراکي توکو د وارداتو برخه کې د اغېزمنې اسانتیا رامنځته کول دي.
د خبرپاڼې له مخې؛ د دغه سفر په ترڅ کې به یاد پلاوی د روسیې د درملو او روغتیايي محصولاتو د تنظیمي ادارو له مسوولینو سره خبرې وکړي او هم به د معیارونو همغږي، د ثبت بهیر د اسانتیا، د کیفیت کنټرول مېکانیزمونو ښه والي او د اغېزمنو همکاريو د چوکاټونو جوړولو په اړه هر اړخیز بحثونه ترسره شي.
خبرپاڼه زیاتوي:« د روسیې د درمل جوړولو معتبرو شرکتونو څخه لیدنه، د تولیدي ظرفیتونو ارزونه، د درملو د تولید او کیفیت کنټرول په برخه کې له پرمختللو ټېکنالوژیو سره اشنا کېدل او د پانګونې برخه کې د ګډو همکاریو زمینې برابرول هم د دغه سفر له مهمو موخو شمېرل کېږي، چې له لارې به یې د درمل جوړونې برخه کې د تجربو تبادله، د ظرفیتونو لوړونه او د ګډو همکاریو د پراختیا لپاره عملي فرصتونه رامنځته شي».
د طالبانو او پاکستان ترمنځ د اړیکو ترینګلتیا او د لارو تړل پاتې کېدو له امله په افغانستان کې د درملو د کمښت ستونزه ډېره شوې او طالبان هڅه کوي د یادې ستونزې د حل لپاره له نورو هېوادونو سره بدیلې سوداګریزې لارې ومومي.
