چینایي رسنیو راپور ورکړی، چې د چین په مرکزي ولایت هونان کې د چانګشا په یوې فابریکه کې چاودنې لږترلږه ۲۱ کسان مړه او ۶۱ نور ټپیان کړي دي. دغه پېښه پر ځايي وخت د دوشنبې په ماښام رامنځته شوه، چې لامل یې لاروښانه نهدی.
د چین دولتي رسنیو د یادې فابریکې نوم «هواشېنګ د اورلوبې تولید او نندارې شرکت» اعلان کړی. د راپورونو له مخې؛ نږدې ۵۰۰ اور وژونکي، ژغورونکي او روغتیایي ډلې د پېښې ځای ته استول شوې دي.
پر خواله رسنیو هم خپرې شوې ویډیوګانې په سیمه کې تور لوګی، نړېدلې ودانۍ او پراخه ویجاړي ښیي. شینهوا خبري اژانس راپور ورکړی، چې د چین ولسمشر شي جېن پېنګ د چټکې او هر اړخیزې پلټنې امر کړی؛ ترڅو د پېښې لامل روښانه شي.
هغه اړوندو ادارو ته امر کړی، چې په مهمو صنعتونو کې د ګواښ څار او کنټرول پیاوړی کړي، عامه خوندیتوب ته پاملرنه وکړي او د خلکو ژوند او ملکیت خوندي کړي. چانګشا په چین کې د اورلوبو د تولید یو له مهمو مرکزونو څخه دی.
د اقتصادي پېچلتیا د څارونکو ادارو د معلوماتو له مخې؛ چین تېرکال د شاوخوا ۱.۱۴ مېلیارد ډالرو په ارزښت د اورلوبې تولیدات بهر ته صادر کړي، چې د نړۍ د پلور له دوه پر درېیمې ډېره برخه جوړوي.
