ناهيد سپان: د افغانستان د ښځینه‌و فوټبال ملي لوبډلې په رسميت پېژندنه یوه تاریخي پېښه ده

هغې ټینګار وکړ، د افغانستان د ښځینه‌و فوټبال ملي لوبډلې په رسمیت پېژندل دا په ډاګه کوي چې د افغان ښځو او نجونو غږ نړۍ ته رسېدلی او اورېدل شوی دی؛ هغه ښځې چې د کار، زده‌کړو او سپورت په برخو کې له پراخو محدودیتونو سره مخ دي.
د سپان په وینا؛ دغه لاسته راوړنه د افغان ښځینه‌و فوټبال لوبغاړو د کلونو هڅو، زیار، صبر او مبارزې پایله ده؛ هغه هڅې چې ټول یې شاهدان دي. هغې زیاته کړه، چې دغه بریا کولای شي د افغان ښځو لپاره د روښانه راتلونکي او مساوي فرصتونو لپاره نوې هیلې راژوندۍ کړي.
د افغانستان د ښځینه‌و کرېکټ ملي لوبډلې لوبډلمشرې یادونه وکړه، چې د هېواد د ښځینه‌و کرېکټ ملي لوبډله لاهم له جدي ننګونو سره مخ ده او د کرېکټ نړۍوالې شورا (ICC) له‌خوا د رسمیت پېژندنې او په لوبو کې د ګډون حق ترلاسه کول غواړي.
هغې هیله څرګنده کړه، چې د افغانستان د ښځینه‌و فوټبال لوبډلې په برخه کې رامنځته شوي پرمختګونه کولای شي په نړۍ کې د ټولو افغان ښځینه‌و لوبغاړو د ملاتړ لپاره لاره هواره کړي.