تېرکال؛ په پاکستان کې د «غیرت» په نوم ۴۷۰ ښځې وژل شوې دي
په پاکستان کې د تېر ۲۰۲۵کال پرمهال د جنسیت پر بنسټ د تاوتریخوالي پېښې ۲۵ سلنه زیاتوالی ښیي، چې له دې ډلې یوازې د ښځو پر وړاندې د سایبري ځورونې ۲زره او ۵۸۶ پېښې ثبت شوې دي. له دې سره ۴۷۰ ښځې بیا د «غیرت» په نوم وژل شوې دي.
د پاکستان د بشري حقونو کمېسیون د ۲۰۲۵کال د بشري حقونو د سرغړونو په اړه خپل کلنی راپور خپور کړ. د راپور له مخې؛ پاکستان په ۲۰۲۵کال کې د بنسټیزو حقونو د پلي کولو له پلوه د ۱۴۳ هېوادونو له ډلې ۱۳۰م ځای خپل کړی او د مرګ سزا کچه هم پهکې لوړه شوې ده.
راپور زیاتوي:« پاکستان د نړۍوال جنسیتي توپیر شاخص کې د ۱۴۸ هېوادونو له ډلې ۱۴۵م ځای لري، د جنسیت پر بنسټ تاوتریخوالي کې ۲۵ سلنه زیاتوالی راغلی، په کورني تاوتریخوالي کې ۱۳۳۲ ښځې وژل شوې او د جنسي تېري ۳زره او ۸۱۵ قضیې ثبت شوې دي. د ښځو پر وړاندې د سایبري ځورونې ۲زره او ۵۸۶ قضیې ثبت شوې، پهداسې حال کې چې ۴۷۰ ښځې د غیرت په نوم وژل شوې دي».
د راپور په یوې برخه کې راغلي، په ۲۰۲۵کال کې ۱۹ نرښځیان وژل شوي چې له دې ډلې پر دوو تېزاب شېندل شوي دي. یوازې په خیبر پښتونخوا کې تر ټولو زیات ۱۰ نرښځیان وژل شوي او ۱۳ د جنسي تاوتریخوالي سره مخ شوي دي.
راپور کاږي، په یاده موده کې د ماشومانو پر وړاندې د تاوتریخوالي ۳زره او ۶۰۰ قضیې راپور شوې دي چې له دې ډلې د تښتونې ۱۱۰۷ قضیې راپور شوې او ۳۶۵ ماشومان بیا لادرکه شوي دي. ورته مهال د کم عمره ودونو ۵۳ قضیې راپور شوې دي.
