د طالبانو د کډوالو او بېرته راستنېدونکو چارو وزارت ویاند عبدالمطلب حقاني وایي، چې په روانې غویي میاشت کې له پاکستان، ایران او ترکیې نه په خپله خوښه او جبري توګه ۱۰۴زره او ۲۵۵ کډوال بېرته افغانستان ته ستانه شوي دي.
د هغه په وینا؛ له دې ډلې ۶۰زره او ۸۰۷ کډوال له پاکستان نه، ۴۲زره او ۸۳۹ کډوال له ایران او ۶۰۹ کسان بیا له ترکیې نه افغانستان ته ستانه شوي دي.
دا په داسې حال کې ده، چې د طالبانو تر کنټرول لاندې د کډوالو ستونزو ته د رسېدلې عالي کمېسیون هره ورځ له ګاونډیو هېوادونو د شاوخوا ۵زره افغان کډوالو د ستنېدو راپور خپروي. دغه کډوال تر ډېره د ننګرهار د تورخم، د کندهار د سپین بولدک، د هرات د اسلامکلا، د نیمروز د ورېښمو پله او د هلمند د بهرامچې له لارې ستنېږي.
له بل پلوه افغانستان ته ستنېدونکي کډوال له پراخې بېکارۍ، د سرپناه له نشتوالي او ځینو نورو ستونزو کړېږي. د طالب چارواکو په وینا، له تېرو پنځو کلونو راهیسې څه باندې ۴نیم مېلیونه افغان کډوال د سیمې له هېوادونو په ځانګړې توګه له پاکستان او ایران نه بېرته افغانستان ته ستانه شوي دي؛ خو طالبانو په دې موده کې یوازې پر څه باندې ۱۰زره کورنیو د استوګنې نمرې وېشلي دي، چې د راستنېدونکو پرتله خورا کمې دي.
