د طالبانو د احصايي او معلوماتو ادارې ویلي، چې د سپوږمکۍ د انځورونو اروزنې ښيي، چې په ۱۴۰۴ کال کې د افغانستان د ځنګلونو ساحه ۳،۳ میلیون هیکټاره وه. د یادې ادارې د معلوماتو له مخې، د ۱۳۹۰ کال په پرتله ځنګلونه ۳۵ سلنه ګڼ شوي دي.
د طالبانو یادې ادارې ویلي، چې د جغرافیايي معلوماتو او ریموټ سنسنګ ټکنالوژۍ د ارزونو پر بنسټ، دمګړی د هېواد د ځنګلونو او بوټو ټولیزه ساحه ۳،۳ میلیونه هیکټاره ده، چې د ټول افغانستان ۵،۰۵ سلنه جوړوي.
د یادې ادارې په وینا، ډېره برخه ځنګلونه ۲۷۴ زره هیکټاره په نورستان کې، ۲۵۳ زره هیکټاره په کونړ، ۱۸۰ زره هیکټاره په بادغیس، ۱۷۰ زره هیکټاره پکتیا، ۱۲۸ زره هیکټاره په خوست او ۱۱۹ زره هیکټاره ځنګلونه په پکتیکا کې دي.
د طالبانو د احصايي او معلوماتو ادارې ویلي، چې د ځنګلونو په ګڼېدو کې تر ټولو ډېر مثبت بدلون په پکتیا، خوست، بدخشان، بغلان، بادغیس، ننګرهار، کونړ، هرات او لغمان ولایتونو کې ثبت شوی دی.
یادې ادارې ویلي، چې طبیعي ځنګلونه د افغانستان ملي شتمني ده چې په اقتصادي پرمختګ کې بنسټیز رول لري.
دا په داسې حال کې ده، چې د اقلیم بدلون له امله ګڼ ولایتونو له وچکالۍ سره مخ دي او د هېواد په ختیزو ولایتونو کې په خپلسري توګه د ځنګلونو د وهلو اندیښني هم لا پرځای دي.
