ټرمپ یوه نوې ترهګرۍ ضد ستراتیژي لاسلیک کړې چې د القاعدې له منځه وړل هم پکې شامل دي
د امریکا ولسمشر ډونالډ ټرمپ یوه نوې ملي ترهګرۍ ضد ستراتیژي لاسلیک کړې چې په یوه برخه کې یې د نشه يي توکو شبکو فلج کول او د الـ.ـقـ.ـاعدې په څېر ډلو هدف ګرځول او له منځه وړل هم شامل دي.
د سپینې ماڼۍ لوړپوړي سلاکار سباستین ګورکا خبریالانو ته ویلي، چې ټرمپ دا سند د سې شنبې په ورځ لاسلیک کړی او دا پرېکړه د دې اصل له مخې شوې چې «امریکا زموږ کور دی او باید وساتل شي».
هغه زیاته کړه چې امریکا په وروستیو میاشتو کې د مخدره توکو ضد عملیاتو په لړ کې لسګونه کښتۍ له منځه وړې دي.
ګورکا وویل: «زموږ نوې ترهګرۍ ضد ستراتیژي د نیمه کرې ترهګریزو ګواښونو بې اغیزې کولو ته لومړیتوب ورکوي».
ګورکا زیاته کړه چې د امریکا د ترهګرۍ ضد چارواکي به د جمعې په ورځ له نړیوالو شریکانو سره وګوري، څو وڅېړي چې متحد هېوادونه څنګه کولی شي د ترهګریزو ګواښونو پر ضد هڅې زیاتې کړي.
هغه وویل چې تېر سپټمبر د محافظهکار فعال چارلي کرک تر وژنې وروسته د سپینې ماڼۍ ځینو چارواکو د هغو ناڅرګندو کیڼ اړخو ډلو پر ضد د ګډ اقدام غوښتنه کړې وه چې د تاوتریخوالي د هڅولو تور پرې لګېږي.
ګورکا دا هم وویل، نوې ستراتیژي به ښي اړخو هغو ډلو ته هم پاملرنه وکړي چې تاوتریخوالی هڅوي.
هغه وویل چې ستراتیژي به همدارنګه د هغه څه پر وړاندې د فشار پر دوام تمرکز ولري چې هغه یې «نړیوال جهادي خوځښت» بولي او د القاعدې په څېر ډلو «هدف ګرځول او له منځه وړل» پکې شامل دي.
