مولانا فضل الرحمان: «هغوی چې علماوو ته مرتد وایي پخپله قاتلان او مرتدین دي»
د پاکستان د جمعیت علمای اسلام ګوند مشر مولانا فضلالرحمان د خیبر پښتونخوا چارسدې ته د سفر پر مهال د یوه دیني عالم مولانا شیخ ادریس وژنه وغندله. هغه د کومې ډلې له نوم اخیستو پرته وویل، «هغه کسان چې دیني علماوو ته مرتد وایي، پخپله قاتلان او مرتدین دي او له اسلام سره تړاو نه لري».
فضلالرحمان د پاکستان له واکمنانو او مسوولو بنسټونو وغوښتل چې د دوی د ګوند د وژل شوي غړي قاتلان پیدا کړي او د قانون منګولو ته یې وسپاري.
هغه زیاته کړه چې دوی د پاکستان له اساسي قانون او سوله ییز نظام سره ولاړ دي او هېڅوک د وسلې سیاست یا بغاوت نه کوي. د هغه په وینا، دوی تل قربانۍ ورکړې دي او یوازې په باجوړ کې یې په یوه غونډه کې ۸۰ جنازې پورته کړې دي.
د جمعیت علمای اسلام مشر داعش ډلې ته له مستقیمې اشارې پرته وویل چې دا خلک په ځمکه کې فساد خپروي. هغه ټینګار وکړ چې په افغانستان او پاکستان کې د مسلمانانو وینه تویول د اسلامي امت تګلاره نه ده او د علماوو مرتد ګڼل د دې ثبوت دی چې بریدګر پخپله له دین څخه وتلي دي.
په ورته وخت کې، د جمعیت علمای اسلام په غوښتنه د چاشنبې په ورځ د خیبر پښتونخوا په ټولو ولسوالیو کې د شیخ ادریس د وژل کېدو پر ضد لاریونونه او غونډې وشوې.
د لاریونونو ویناوالو د ادریس د وژونکو د سملاستي نیولو غوښتنه وکړه او ویې ویل چې په ایالت کې ناامني او د واکمنانو بېکفایتي د دې ښکارندویي کوي چې د علماوو او مدرسو پر ضد د نړیوالو اجنډاوو د پلي کولو هڅې روانې دي.
د سې شنبې په سهار د خیبر پښتونخوا په چارسده سیمه کې د مولانا محمد ادریس ترنګزي په نامه د یوه دیني عالم پر موټر وسله وال برید وشو، چې له امله یې نوموړی له خپل موټر چلوونکي سره ووژل شو او دوه ساتونکي یې ټپیان شول.
داعش ډلې د یوې اعلامیې په خپرولو سره د نوموړي د وژنې مسوولیت پر غاړه اخیستی دی.
