شهباز شریف د ډونالډ ټرمپ لهخوا د «ازادۍ پروژې» د ځنډلو له پرېکړې هرکلی کړی
د پاکستان لومړي وزیر شهباز شریف پر اېکس پاڼه د یوه پیغام په خپرولو د امریکا د ولسمشر ډونالډ ټرمپ لهخوا د « ازادۍ پروژې» د ځنډلو له پرېکړې هرکلی کړی. هغه لیکلي، چې دغه ګام به په اوسني حساس وخت کې د سیمې د تاوتریخوالي په کمښت کې مهم رول ولوبوي.
نوموړی زیاتوي، چې دغه پرېکړه د پاکستان او یوشمېر نورو هېوادونو په ځانګړي ډول د سعودي عربستان د غوښتنې په ځواب کې شوې ده. پاکستان د سعودي عربستان د ولیعهد او لومړي وزیر شهزاده محمد بن سلمان هڅې هم د سیمې د سولې لپاره مهمې بللې دي.
نوموړي ټینګار کړی، د سیمې د سولې، ټیکاو او پخلاینې لپاره به د ټولو هغو هڅو ملاتړ ته دوام ورکړي چې د خبرو اترو او ډیپلوماسۍ له لارې د شخړو حل ته لاره هواروي. هغه په دغه پیغام کې هیله څرګنده کړې، چې اوسنی پرمختګ به په راتلونکې کې د یوې دوامدارې هوکړې لامل شي؛ څو په سیمه او نړۍ کې تلپاتې سوله ټینګه شي.
د امریکا ولسمشر ډونالډ ټرمپ بیا د سېشنبې په ورځ د ایران پوځي وړتیا کمزورې وبلله او ویې ویل، چې تهران «باید د تسلیمېدو سپین بېرغ پورته کړي»؛ خو زیاته یې کړه، «ایران دومره مغرور دی چې دا کار نهکوي».
ټرمپ په اوول دفتر کې خبریالانو ته وویل، چې د ایران پوځ اوس یوازې «سپکو ډزو» ته پاتې شوی او تهران په پټه غواړي له امریکا سره معامله وکړي؛ خو په ښکاره سخت دریځ ښيي.
