د طالبانو د کور او ښار جوړولو وزارت خبر ورکړی، د دغه وزارت لهخوا د کونړ هغو زلزلهځپلو کورنیو ته چې د وروستۍ زلزلې له امله یې کورونه ویجاړ شوي وو؛ د ننګرهار ولایت د ښېوې ولسوالۍ اړوند په ګمبیري سیمه کې پر زر جریبه ځمکه په نوي جوړ شوي ښارګوټي کې استوګنیزې نمرې وېشل شوې دي.
د یاد وزارت لهخوا په خپرې شوې خبرپاڼه کې راغلي، یاد ښارګوټی د معیاري ښاري پلان له مخې ډیزاین شوی چې پهکې د اوسېدو نمرو ترڅنګ سړکونه او بنسټیزې اسانتیاوې هم په پام کې نیول شوې دي.
د خبرپاڼې له مخې، په دغه ښارګوټي کې د ښوونځي، مدرسې، جومات، روغتیایي کلینیک او هدیرې لپاره ځانګړې ځمکې ټاکل شوې؛ ترڅو اوسېدونکو ته یو منظم او بشپړ چاپېریال برابر شي.
د طالبانو د کور او ښار جوړولو وزیر مولوي نجیبالله حیات حقاني د یاد ښارګوټي د پرانیسي په مراسمو کې ویلي، هڅه کوي چې زلزلهځپلې کورنۍ پیاوړې کړي او د ټولنې د فعالو غړو په توګه یې وروزي؛ څو د مرستې له اخیستونکو څخه د مرستې کوونکو کچې ته ورسېږي.
دا په داسې حال کې ده، چې د تېر ۱۴۰۴کال په وږي میاشت کې د افغانستان ختیځې برخې یوې زورورې زلزلې ولړزولې چې له امله یې ترټولو ډېره مرګ ژوبله د کونړ ولایت اوسېدونکو ته واړوله او ګڼ کورونه یې په بشپړه توګه ویجاړ کړل. د کونړ زلزلهځپلي تر یادې زلزلې وروسته لاهم د سرپناه له نشتوالي شکایت کوي.
