د رستاق-تالقان پل ویجاړېدو له امله؛ بنسټیزو خدمتونو ته د ځایي خلکو لاسرسی ستونزمن شوی
د تخار ولایت د رستاق ولسوالۍ اوسېدونکو افغانستان انټرنشنل ته خبر ورکړی، د توتاش پل چې په سیمه کې یو له مهمو پلونو څخه دی؛ د سرو زرو کان کېندونکو شرکتونو لهخوا د نامسلکي کېندنو او وروستیو سېلابونو له امله ویجاړ شوی، چې له امله یې بنسټیزو خدمتونو ته د ځایي خلکو لاسرسی ستونزمن شوی.
دغه پل لسګونه کلي د رستاق ولسوالۍ مرکز او د تخار ولایت مرکز تالقان ښار سره نښلوي. ځایي اوسېدونکي وایي، چې د پله په ویجاړېدو سره د دغه سیمو ترمنځ اړیکه په بشپړه توګه پرې شوې او بازارونو، روغتیایي مرکزونو او بنسټیزو خدمتونو ته د یادو سیمو د اوسېدونکو لاسرسی په جدي توګه ګډوډ شوی دی.
د ځايي اوسېدونکو په وینا، د پل له ویجاړېدو دمخه د دغه کلیو اوسېدونکو کولای شوای، چې تالقان ته په یو ساعت کې ورسېږي؛ خو اوس دوی باید د ولایت مرکز ته د رسېدو لپاره پر ستونزمنو لارو تر پنځو ساعتونو ډېر مزل وکړي.
دوی زیاتوي، چې دغه وضعیت د خلکو لپاره روغتیايي خدمتونو او روغتونونو ته لاسرسی خورا ستونزمن کړی دی. لاتراوسه په دې اړه د ځایي طالب چارواکو یا د سرو زرو کانونو شرکتونو لهخوا کوم رسمي ځواب نهدی وړاندې شوی.
