د پخواني جمهوري نظام د چارو ادارې مشر فضل محمود فضلي وایي، په اوسنیو شرایطو کې د ارزښتونو د دفاع او احیا لپاره بهرنیو ادارو ته مراجعه نه یوازې «ځانغولونه» او د وخت ضایع کول دي، بلکې د یوې رښتینې افغاني سیاسي پروسې ټکني کول او مخنیوی یې هم دی.
فضلي د چارشنبې په ورځ، د غویي ۱۶مه پر اېکسپاڼه، په خپلو څرګندونو کې د ۲۰۲۰ کال حالاتو ته په اشارې سره ویلي، هغه مهال چې امریکا په دوحه کې له طالبانو سره د افغانستان د سیاسي راتلونکې په اړه په خبرو بوخته وه، افغان حکومت هڅه وکړه چې د ولسواکۍ ارزښتونه، په ځانګړي ډول د ښځو حقونه، د اروپایي ټولنې له لارې خوندي کړي.
د هغه په وینا، د اروپایي ټولنې د سفیرانو او استازو ځواب دا و چې که څه هم ارزښتونه مهم دي، خو دغه ټولنه د امریکا پرېکړو او سیاستونو ته لومړیتوب ورکوي.
هغه لیکلي چې د اروپایي ټولنې د سفیرانو او استازو واحد ځواب داو :«په دې کې شک نشته چې ارزښتونه مهم دي، خو اروپایي ټولنه د امریکا فرمایشاتو او پرېکړو ته تر هر څه لومړیتوب ورکوي».
فضلي ټینګار کړې چې له همدې تجربې وروسته څرګنده شوې چې په اوسنیو شرایطو کې بهرنیو بنسټونو ته تمه کول نه یوازې ستونزې نه حل کوي، بلکې د یوې رښتینې او خپلواکې افغاني سیاسي پروسې مخه هم نیسي او ځنډولی یې شي.
