په کابل کې یو شمېر محصلان وایي طالبان ترې د امربالمعروف قانون د منلو جبري ژمنې اخلي
افغانستان انټرنشنل ته له کابل ښار څخه یو شمېر محصلانو د یوه مکتوب په استولو سره ادعا کړې، چې طالبان د خصوصي پوهنتونونو له محصلینو څخه د امربالمعروف قانون د منلو جبري ژمنې اخلي.
د دغو محصلانو په وینا، هره ورځ پر دوی فشار راوړل کېږي، چې له زدهکړو او پوهنتون څخه زړه توري شي او د کډوالۍ لاره خپله کړي. هغوی دا وضعیت د هېواد د علمي راتلونکې لپاره «اندېښمنوونکی» بولي.
یادو محصلانو همداراز ادعا کړې، چې په کابل ښار کې د امنیت وضعیت هم د اندېښنې وړ دی.
د هغوی په خبره، داسې شپه نه تېرېږي چې د خلکو کورونه له غلاوو خوندي پاتې شي.
دوی زیاتوي، چې د خلکو پر کورونو او شتمنیو د غلا پېښې زیاتې شوې دي او هېڅوک نشته چې د دغو کړنو مخه ونیسي.
تر دې مخکې طالبانو په پکتیا، خوست او زابل کې هم له محصلانو نه د امربالمعروف قانون د منلو جبري ژمنې اخیستې دي.
د یادونې وړ ده چې دغه ادعاوې یوازې د کابل ښار د یو شمېر محصلانو روایت دی او تر اوسه په خپلواکه توګه نه دي تایید شوې.
