د ایران او ترکیې ترمنځ له ماکو سرحدي سیمې څخه یو افغان پناه غوښتونکي په رالیږلی پیغام کې ادعا کړې، چې د دوشنبې په ورځ، د غويي پر۱۴مه، یو شمېر افغان ځوانان چې غوښتل یې ترکیې ته واوړي، د دغه هېواد سرحدي ځواکونو وهلي او «لاس او پښې یې ورماتې کړې او د ځینو غوږونه غوڅ شوي».
نوموړي دا نه ده روښانه کړې، چې غوږونه یې د وهلو پرمهال ټپي شوي او که غوڅ کړای شوي دي.
د نوموړي په وینا، ترکي پولهساتو پر دغو پناه غوښتونکو تاوتریخوالی کړی دی.
هغه زیاته کړې چې یو شمېر ټپیان د درملنې لپاره تهران ته لېږدول شوي دي.
دغه پناه غوښتونکي له ملګرو ملتونو غوښتي چې د دې ادعاوو ، په ځانګړي ډول له کډوالو سره د تاوتریخوالي او د هغوی د غوږونو د پرې کولو د موضوع په اړه جدي څېړنه وکړي.
نوموړی ویلي، چې « ۱۰ تنه وو، ځینې یې تهران ته روغتون ته لیږدول شوي. په دې سیمه کې ډېر افغانان بند پاتې دي او ترکي ځواکونه اجازه نه ور کوي، چې دغه هېواد ته واوړي».
په رالیږل شویو ویډیوګانو کې ښکاري، چې افغان پناه غوښتونکي په وړو خیمو کې میشت دي او لاسونه او پښې یې ټپي دي.
ترکي ځواکونو او خپلواکو سرچینو تر اوسه ددې ادعاوو په اړه څه نه دي ویلي، خو په دې وروستیو کې دغه هېواد له غیرقانوني لارو د کډوالو پر ورتګ بندیزونه ډېر کړي دي.
