له ۲۰۱۵کال راهیسې یوازې په خیبر پښتونخوا کې ۱۵۷ نرښځیان وژل شوي
په پاکستان کې د نرښځیانو ټولنه له تاوتریخوالي، توپیري چلند او د ایډز ناروغۍ زیاتېدونکي ګواښ له امله شکایت کوي. راپورونه ښيي، چې له ۲۰۱۵کال راهیسې په خیبر پښتونخوا کې ۱۵۷ نرښځیان وژل شوي، چې یوازې په تېر ۲۰۲۵کال کې اته د وژنې پېښې ثبت شوې دي.
د ۲۰۲۳کال د شمېرو له مخې؛ په پاکستان کې ۲۱زره او ۷۷۴ تر ښځیان ثبت شوي، چې له دې ډلې ۵۷ سلنه په پنجاب، ۵زره او ۹۵۴ په سند، ۱۹۹۹ په خیبر پښتونخوا، ۷۸۰ په بلوچستان او ۲۸۰ په اسلاماباد کې ژوند کوي.
د پاکستان د بشري حقونو کمېسیون د معلوماتو له مخې؛ یوازې په خیبر پښتونخوا کې له ۲۰۱۹ تر ۲۰۲۳ کال پورې د نرښځیانو پر وړاندې ۲۶۷ د تاوتریخوالي پېښې ثبت شوې؛ خو یوازې په یوه قضیه کې مجرم ته سزا ورکړل شوې ده.
په ملي کچه هم د پاکستان د بشري حقونو ادارې وایي، چې له ۲۰۰۹کال راهیسې په دغه هېواد کې د نرښځیانو پر وړاندې تر ۱۸۰۰ زیاتې د تاوتریخوالي پېښې ثبت شوې دي. بل لور ته د ایډز د کنټرول ملي پروګرام د شمېرو له مخې؛ د نرښځیانو ترمنځ د ایډز کچه له ۵،۵ تر ۱۰ سلنې پورې ده.
کارپوهان وایي، چې اقتصادي ستونزې، د کار نشتوالی، جبري جنسي ځورونه او روغتیايي خدمتونو ته محدود لاسرسی په نرښځیانو کې د دغه ناروغۍ د پراختیا مهم لاملونه دي. بل لور ته د خیبر پښتونخوا ایالت سوات اړوند مینګوره سیمه کې شاوخوا ۳۰۰ نرښځیان ژوند کوي؛ په وروستیو میاشتو کې له یادې سیمې د هغوی د اېستلو غوښتنې زیاتې شوې دي، چې له امله یې ګڼ شمېر نرښځیان له دغه ښاره وتلي هم دي.
فعالان وایي، نڅا او د خوښیو محفلونه چې د نرښځیانو د عاید اصلي سرچینه ده؛ شاوخوا ۴۰ سلنه کمه شوې ده.
