د پاکستان د پوځ ویاند جنرال احمد شریف چودري نن پنجشنبه(د غويي ۱۷مه) په یوه خبري ناسته کې وویل چې طالبان د وخت په پلمه «چل» کوي، خو زیاته یې کړه، چې « دوی زموږ پر وړاندې زموږ بچي ښکاري».
نوموړی وايي، چې لا هم په افغانستان کې د دوی عملیات روان دي او په دې اړه هېڅ ډول شک نشته.
د هغه په وینا، دا عملیات د پاکستان د کورني ملي امنیت پلان یوه ځانګړې برخه ده.
چودري ویلي، اسلاماباد د امریکا او ایران ترمنځ د خبرو د اسانولو په برخه کې مهم رول لوبولی چې هدف یې د منځني ختیځ د جګړې پای ته رسول دي.
نوموړي پاکستان یو «منطقي دولت» بللی او په مقابل کې یې د طالبانو «د نامسوولانه چلند» یادونه کړې ده.
هغه زیاته کړې چې «طالبان دا مهال نه د یو منطقي لوبغاړي په توګه عمل کوي او نه د یو منظم دولت په څېر فعالیت کوي».
جنرال چودري پوښتنه کړې چې ایا کوم منطقي لوبغاړی د ترهګرۍ له لارې د یوه هېواد اصلي عاید جوړوي، یا خپلو خلکو ته د برابر پرمختګ او بیان حق نه ورکوي؟
هغه زیاته کړې، «په افغانستان کې د «غضبللحق عملیات» روان دي او دا د افغان طالبانو د رژیم له کړنو سره تړاو لري، نه له افغانستان او د هغه له خلکو سره».
نوموړي دغه راز ویلي «زموږ غوښتنې ساده دي، په خپله خاوره کې ترهګرو ته ځای مه ورکوئ، ولې مو نورولي مسید او نورو ملګري په افغانستان کې ساتلي دي؟».
هغه ویلي چې د پاکستان دغه عملیات د پاکستان د ترهګرۍ ملي عمل د پلان یوه برخه ده او زیاتوي چې په دې موده کې پېښې کمې شوې او د وسلهوالو د مرګ ژوبلې کچه لوړه شوې ده.
د طالبانو ادارې د پاکستان د پوځ د ویاند د دغو څرګندونو په تړاو تر دې دمه غبرګون نه دی ښودلی.
