د سهیل اپریدی په امر؛ د پښتونخوا ایالتي حکومت د مرکزي حکومت د تګلارو پرضد کار بندیز وکړ

دا د پاکستان په تاريخ کې لومړی ځل دی، چې يو ایالتي مشر د مرکزي تګلارو پر ضد دولتي چارې دروي. د اعتصاب پرمهال دولتي دفترونه پرانيستي وو؛ خو هېڅ رسمي سند نه‌و لاسليک شوی او يوازې بېړني خدمتونه روان وو.
د خيبر پښتونخوا ځایي حکومت ويلي:« دا مرکزي حکومت ته يو سوله‌ييز خو پياوړی پيغام دی. زموږ حقونه په پرله‌پسې ډول له پامه غورځول کېږي». د سهیل ابریدي د دفتر په وینا؛ دغه اعتصاب د مرکزي حکومت د دوامداره او تبعيضي چلند پرضد شوی دی.
د خیبر پښتونخوا ایالتي حکومت وايي، دوی ته د ملي مالي کمېسيون په بودجه کې عادلانه ونډه نه ورکول کېږي او د برېښنا او ګازو سرچينې هم په برابر ډول نه وېشل کېږي. سهيل اپرېدي د روانې اونۍ په پيل کې د دغه اعتصاب اعلان کړی و او له ټولو ایالتي ادارو يې غوښتي وو، چې په دغه اعتصاب کې برخه واخلي.

که څه هم د خلکو پر ورځنيو خدمتونو کوم لوی اغېز نه‌دی پرېوتی؛ خو دغه اقدام بېلابېل غبرګونونه راپارولي دي.