چین خپل دوه پخواني دفاع وزیران په تعلیقي اعدام محکوم کړل
د چین یوې پوځي محکمې په یوه کمساري پرېکړه کې د دغه هېواد دوه پخواني دفاع وزیران، وي فینګهه او لي شانګفو، د درغلیو او بډې اخیستنې په تور په دوه کاله تعلیقي اعدام محکوم کړي دي.
د چین دولتي خبري اژانس شینهوا راپور ورکړی چې دغې محکمې د پنجشنبې په ورځ، د غویي۱۷مه، وي فینګهه چې د مرکزي پوځي کمېسیون پخوانی غړی، د دولت سلاکار او د ملي دفاع پخوانی وزیر و، د رشوت اخیستنې په جرم مجرم وپېژاند او ورته یې د دوو کلونو تعلیق سره د اعدام سزا واوروله.
محکمې همداراز اعلان کړی چې هغه به د تل لپاره له سیاسي حقونو بېبرخې شي او ټوله شخصي شتمني به یې مصادره شي. د حکم له مخې، کله چې د دوو کلونو تعلیقي موده پای ته ورسېږي او سزا په قانوني ډول په عمر بند بدله شي، وي فینګهه به تر پایه په زندان کې پاتې کېږي او د سزا د کمېدو یا مشروطې خوشې کېدا هېڅ امکان به ونه لري.
په ورته وخت کې، پوځي محکمې د بل پخواني دفاع وزیر او د مرکزي پوځي کمېسیون د پخواني غړي، لي شانګفو، په تړاو هم حکم صادر کړی دی. هغه د رشوت اخیستنې او ورکولو په تور مجرم پېژندل شوی او د څو تورونو په یوځای کېدو سره ورته د دوو کلونو تعلیق سره د اعدام سزا ورکړل شوې ده.
لي شانګفو هم د وي فینګهه په څېر د تل لپاره له سیاسي حقونو محروم شوی او ټوله شتمني یې مصادره شوې ده. د هغه سزا به هم وروسته په عمر بند بدله شي او هغه به د مشروطې خوشې کېدو یا د سزا د تخفیف له حق څخه بېبرخې وي.
دواړه کسان مخکې د چین د پوځي او سیاسي نظام لوړپوړي چارواکي وو او د مرکزي پوځي کمېسیون غړیتوب یې درلود، چې د دغه هېواد تر ټولو لوړه پوځي اداره بلل کېږي.
