تحريک انصاف ګوند: د عمران خان مېرمن بشرا بيبي په پټه روغتون ته لېږدول شوې
د پاکستان تحريک انصاف ګوند ويلي، د پخواني لومړي وزير عمران خان مېرمن بشرا بيبي تېره شپه په پټه له اډياله زندانه روغتون ته لېږدول شوې او څو ساعته وروسته بېرته زندان ته ستنه کړای شوې ده. یاد ګوند دغه چاره له بشري حقونو ښکاره سرغړونه بللې ده.
د تحريک انصاف ګوند ويلي، چې د بشرا بيبي د روغتيايي حالت په اړه د معلوماتو پټ ساتل د کورنۍ او خلکو اندېښنې زياتې کړې دي. د راپورونو له مخې؛ بشرا بيبي د سختو امنيتي تدابيرو لاندې د سترګو د معاينې لپاره روغتون ته وړل شوې وه.
نوموړې تېره مياشت د راولپنډۍ په يوه روغتون کې خپله ښۍ سترګه عملیات کړې وه. تحريک انصاف ګوند په خپل بيان کې پوښتنه کړې، که د بشرا بيبي روغتيايي حالت دومره خراب و چې د شپې ناوخته روغتون ته لېږدول کېده؛ نو حکومت او د زندان چارواکي ولې د هغې د حالت په اړه ولس ته معلومات نهورکوي.
یاد ګوند ويلي، بايد څرګنده شي چې بشرا بيبي کوم روغتون ته وړل شوې وه، کوم روغتیایي معاينات یې شوي، کومو ډاکټرانو يې درملنه کړې او د کومې روغتیایي ارزونې پر بنسټ بېرته زندان ته ستنه کړای شوې ده.
تحريک انصاف ګوند زياته کړې، چې بشرا بيبي له څو مياشتو راهيسې له يوازېتوب، رواني فشار او ناسم چلند سره مخ ده او د هغې شخصي ډاکټرانو او کورنۍ ته له نوموړې سره پر ملاقات محدودیتونه د اندېښنې وړ دي.
تحريک انصاف ګوند همداراز ويلي، بشرا بيبي بايد سملاسي د اسلاماباد شفا نړۍوال روغتون ته ولېږدول شي او د بشري حقونو خپلواکې ادارې دې د هغې روغتيايي وضعيت وڅېړي. د دغه ګوند مشر عمر ايوب ويلي، روغتون ته د بشرا بيبي د لېږد پرمهال د هغې کورنۍ ته خبر نهو ورکړل شوی.
نوموړي زياته کړې، چې د بشرا بيبي روغتيايي حالت د اندېښنې وړ دی. تحريک انصاف ګوند خبرداری ورکړی، که د عمران خان يا بشرا بيبي روغتيا ته هر ډول زيان ورسېږي، پړه به يې د حکومت، د زندان د چارواکو او اړوندو ادارو پر غاړه وي.
