ټرمپ: ایران سره اوربند لا هم پر ځای دی او د امریکا وروستي بریدونه یوازې «سپک ګوزار» و
د امریکا ولسمشر ډونالډ ټرمپ د امریکا له اېبيسي نیوز شبکې سره د هُرمز تنګي د وروستیو نښتو په اړه ویلي، چې «اوربند پای ته نه دی رسېدلی او لا هم پر خپل ځای پاتې دی». ټرمپ پر ایران د امریکا وروستي بریدونه «یوازې یو سپک ګوزار» بللی دی.
د امریکا مرکزي قوماندانۍ یا سنټکام ویلي، چې امریکايي ځواکونو د غویي میاشتې په ۱۷مه نېټه، هغه مهال چې د امریکا د هدایتېدونکو توغندیو سمبالې جنګي بېړۍ د هرمز له تنګي څخه د عمان سمندر پر لور تېرېدلې، د ایران له لوري توغول شوي توغندي، بېپیلوټه الوتکې او واړه بریدګرې کښتۍ شنډې کړې.
سنټکام زیاته کړې، چې امریکايي ځواکونو وروسته په ایران کې د دغو بریدونو پر سرچینو هم بریدونه کړي دي.
