راشدخان یو وار بیا په نړۍ کې د یو ورځنیو او شل اوریزو لوبو غوره توپاچوونکی شو
په نړۍ کې د کرېکټ د غوره لوبغاړو په تازه ډلبندۍ کې د افغانستان د کرېکټ ملي لوبډلې ستوري راشدخان د نړۍ د غوره توپاچوونکي په توګه هم د یو ورځنیو او هم د شل اوریزو سیالیو په کټګورۍ کې خپل لومړی مقام ساتلی دی.
نوموړی په یو ورځنیو لوبو کې د ۷۰۵ امتیازونو او په شل اوریزو لوبو کې د ۷۵۳ امتیازونو په ترلاسه کولو یو وار بیا د جدول په سر کې راغلی. د یو ورځنیو سیالیو د توپاچوونکو په ډلبندۍ کې راشدخان له ۷۰۵ امتیازونو سره په لومړي مقام کې دی. له هغه وروسته جوپرا ارچړ له ۶۴۹ امتیازونو سره دویم او د سویلي افریقا لوبغاړی کیشو مهاراج له ۶۴۵ امتیازونو سره درېیم مقام لري.
د شل اوریزو لوبو د توپ اچوونکو په ډلبندۍ کې بیا راشد خان له ۷۵۳ نمرو سره په سر کې دی. له هغه وروسته د هند لوبغاړی چکروټي د ۷۴۰ امتیازونو په لرولو دویم او د پاکستان لوبغاړی ابرار احمد د ۷۳۶ امتیازونو په لرلو درېيم ځای لري.
د یو ورځنیو سیالیو د توپوهونکو په برخه کې د افغانستان د ملي لوبډلې لوبغاړی ابراهیم ځدراڼ له ۷۵۶ امتیازونو سره د یادې ډلبندۍ درېیم مقام خپل کړی. په دغه ډلبندۍ کې د نیوزیلینډ ډاریل مېچل له ۸۱۵ امتیازونو سره لومړی او د هند مشهور لوبغاړی ویراټ کوهلي له ۷۹۱ امتیازونو سره دویم مقام خپل کړی دی.
