د هلمند ولایت لپاره د طالبانو د کرنې، اوبو لګونې او مالدارۍ ریاست وايي، سږکال به د شفتالو له بڼونو څه باندې ۱۵۵۵ ټُنه حاصلات راټول شي چې دغه شمېر د تېر کال پر تله د ۱۰ سلنې زیاتوالي ښکارندويي کوي. بڼوالان بیا په دغه ولایت کې د سړوخونو د جوړېدو غوښتونکي دي.
د هلمند ولایت لپاره د طالبانو د کرنې ریاست مسوولین د شفتالو د حاصلاتو د ډېرښت لامل د دوی له لوري په مسلکي ډول د بڼوالو روزل په ګوته کوي.
د دغه ریاست د پلان او پروګرامونو مدیر شفیقالله مبین وايي: «دا وارې زموږ لهخوا بڼوالو ته روزنه ورکړل شوې او د بڼونو د جوړولو په برخه کې موږ همکاري کړې ده. د تېر کال په نسبت حاصلات زیات شوي او د شفتالو په رنګ، خوند او کیفیت کې تغییر راغلی او بازار یې هم ښه دی».
بڼوال بیا په دغه ولایت کې د میوو او سبزیجاتو د ساتنې لپاره د معیاري سړو خونو د جوړېدو غوښتنه لري. دوی وايي، که په دغه ولایت کې سړې خونې جوړې شي، نو کولی شي د یوه فصل میوه بل فصل ته په خوندي ډول وساتي.
د تازه میوو سوداګر وايي، پخوا په افغانستان د هر ډول میوو د حاصلاتو د رسېدو پر مهال له پاکستانه ورته حاصلات راوړل کېدل او په دې سره یې بازار له لاسه ورکاوه.
په دغه ولایت کې د تازه میوو سوداګر محمد هاشم وايي: «موږ هره میوه چې په باغونو کې مو خرید کړی پخوا به پاکستان ته اېلا وو او د پاکستان میوې به زموږ خواته راتلله، زموږ بازار به یې ګډوډ کړی وو. اوس چې موږ په کومه تمه چې میوې رانیولي د پاکستان میوه بنده ده، موږ یې چې بازار ته واستوو، نو په ښه قیمت خرڅېږي».
په هلمند کې د شفتالو فصل له رارسېدو سره یو شمېر کارګرو ته هم لنډ مهالي کاري زمینې برابرې شوي دي. دغه کارګر وايي، په ورځ کې له ۲۰۰ تر ۳۰۰ افغانیو مزدوري کوي.
د هلمند د شفتالو د پلورونکو په وینا، دمګړۍ په دغه ولایت کې یو من ښه شفتالو له ۲۰۰ تر ۲۲۰ افغانۍ ده.
د دغه ولایت لپاره د طالبانو د کرنې ریاست وايي، سږکال د هلمند پر ۱۸۳ هکټاره ځمکه شفتالو کرل شوي او ادعا لري، چې دمګړۍ دغه ولایت د میوو او سبزیجاتو له اړخه پر ځان بسیا شوی او ډېری وخت نورو ولایتونو ته هم یادې میوې استوي.
