د پاکستان د پنجاب ایالت په ډېره غازي خان سیمه کې د یوه خصوصي ښوونځي د ټولګي چت پرېوتو له امله لږترلږه څلور ماشومان مړه او شاوخوا ۲۰ نور ټپیان شوي دي. پاکستاني رسنیو راپور ورکړی، په ټپیانو کې ۱۶ زدهکوونکي، دوه ښوونکي او دوه کارګر شامل دي.
د ژغورنې ډلو په خبره؛ دغه پېښه د پنجشنبې په ورځ غرمه مهال رامنځته شوې ده. لومړنۍ څېړنې ښيي، چې د ښوونځي په ودانۍ کې د پراختیا ودانیز کار روان و او د ټولګي پر چت شګې او خښتې اېښودل شوې وې. د چارواکو په وینا؛ چت د زیات وزن او دروندوالي له امله راپرېوتی دی.
د ډېره غازي خان سیمې د پوهنې ادارې مشر وقاص ګېل ویلي، چې د پېښې په اړه به بشپړې پلټنې وشي او که د ښوونځي ادارې بېغوري کړې وي؛ نو پرضد به یې قانوني اقدام وشي. بل لور ته د پنجاب سر وزیرې مریم نواز هم د پېښې په اړه د راپور غوښتنه کړې او اړونده ادارو ته یې د بېړنیو پلټنو امر کړی دی.
