سید عباس عراقچي: د امریکا کړنو د ډیپلوماسۍ بهیر ته زیان رسولی
ایراني رسنیو راپور ورکړی، چې د دغه هېواد د بهرنیو چارو وزیر سید عباس عراقچي له خپل ترکي سیال هاکان فیدان سره په ټلیفوني خبرو کې ویلي، دامریکا له لوري په فارس خلیج کې «تاوتریخوالی رامنځته کول» او د اوربند نقض د ډیپلوماسۍ بهیر ته زیان رسولی دی.
عراقچي ویلي، د ډیپلوماټیکو هڅو د پرمخ بیولو لپاره اړینه ده چې «غیرقانوني اقدامات» ودرول شي.
بل لور ته، اناتولي خبري اژانس راپور ورکړی چې هاکان فیدان له عراقچي سره د دې لپاره اړیکه نیولې وه څو د ایران او امریکا ترمنځ د خبرو اترو وضعیت و ارزوي.
د اناتولي د راپور له مخې، د ترکیې د بهرنیو چارو وزارت سرچینو ویلي چې دواړو وزیرانو د تهران او واشنګټن ترمنځ د روانو مذاکراتو اوسنی پړاو څېړلی دی.
تر اوسه د دغه ټلیفوني خبرې د نورو جزییاتو په اړه معلومات نه دي خپاره شوي، خو دا تماس داسې مهال ترسره کېږي چې د ایران او امریکا ترمنځ د تاوتریخوالي د کمولو او احتمالي تفاهم لپاره ډیپلوماټیکې هڅې دوام لري.
