په بلوچستان کې د درېیو جلا ټرافیکي پېښو له امله ۹ کسان مړه او ۳۳ نور ټپیان شوي دي
په بلوچستان ایالت کې د درېیو جلا ټرافیکي پېښو له امله د ښځو او ماشومانو په ګډون ۹ کسان مړه او ۳۳ نور ټپیان شوي دي. دغه پېښې د بلوچستان په خضدار، کلات او مراد جمالي سیمو کې شوې دي.
د بلوچستان ایالت له خضدار نه د جهل مګسي پر لور روان یو مساپر وړونکی بس د ساوندي او باریجه سیمو ترمنځ د چټک مزل له امله یوې کندې ته لوېدلی، چې له امله یې د یوې ښځې او یوه ماشوم په ګډون اته کسان مړه او شاوخوا ۳۰ نور ټپیان شوي دي. ځایي پولیس وایي، د یادې پېښې ټپیان ګنداوه دولتي روغتون ته لېږدول شوي دي.
بلخوا د کلات ولسوالۍ د کوټې ـ کراچۍ پر لویه لاره د ګراني په سیمه کې د دوو موټرو د ټکر له امله یو کس مړ او یو بل ټپي شوی دی. په ډېره مراد جمالي کې بیا په یوې ټرافیکي پېښه کې د یوې ښځې په ګډون دوه کسان ټپیان شوي دي.
