عوامي نيشنل ګوند:له افغانستان سره ستونزې باید د خبرو له لارې حل شي
د عوامي نيشنل ګوند د خیبر پښتونخوا څانګې ایالتي مشر میا افتخار حسین په پېښور باچا خان مرکز کې یوې غونډې ته وييل چې افغانستان په ګډون له ټولو ګاونډیو هېوادونو سره سولهییزې او سوداګریزې اړیکې د وخت مهمه اړتیا ده.
نوموړي زیاته کړه چې جګړه ستونزې نه حلوي، بلکې نورې یې هم زیاتوي.
د هغه په وینا، له افغانستان سره ټولې ستونزې باید د جګړې پر ځای د خبرو او سیاسي لارو حل شي.
میا افتخار حسین په خپلو خبرو کې ويلي چې په تېرو پنځو لسیزو کې پښتنې سیمې له جګړو، ناامنۍ او وینې تویېدو سره مخ دي او هره ورځ په خیبر پښتونخوا کې خلک وژل کېږي.
هغه زیاته کړه، که په سیمه کې سولهییزې اړیکې ټینګې شي، نو د پرمختګ او سوکالۍ نوې لارې به پرانیستل شي.
نوموړي زیاته کړې چې ځینې کړۍ په پښتنو سیمو کې ناامني د خپلو ګټو لپاره کاروي او هڅه کوي د سیمې پر طبیعي زیرمو او کانونو واک ترلاسه کړي.
