د افغانستان لپاره د اروپایي ټولنې شارژدافیرې ویرونیکا بوکوویچ پوهار د اروپا د ورځې په مناسبت ویلي، چې دا ټولنه د افغانانو ملاتړ ته په بشپړه توګه ژمنه ده. هغې ټینګار کړی، چې اروپایي ټولنه د افغانستان د خلکو ترڅنګ ولاړه ده.
مېرمن بوکوویچ پوهار د شنبې په ورځ (د غويي ۱۹مه) په خپله اېکسپاڼه د افغانانو وضعیت ته په اشارې سره ویلي، چې اروپایي ټولنه د افغانستان د خلکو درناوي، زغم او راتلونکي ته ژمنه پاتې کېږي. هغې د افغانانو پر مقاومت او راتلونکي ژوند هم ټینګار کړی دی.
د اروپایي ټولنې دې استازې په خپل پیغام کې زیاته کړې: «د هر نوي کار رامنځته کول، د هر ماشوم روزنه او د هرې کورنۍ ملاتړ په اصل کې پر سولې او ثبات پانګونه ده».
د افغانستان لپاره د اروپایي ټولنې شارژدافیرې په دې پیغام کې د افغانانو لپاره د کارموندنې، ښوونې او روزنې او د کورنیو د ملاتړ پر اهمیت هم څرګندنې کړې دي
