افغان کرېکټ بورډ ویلي، چې د چین په رسمي بلنه او د ورزشي ډيپلوماسۍ او کرېکټ ته د پراختیا ورکولو په موخه یې یو تخنیکي پلاوی یاد هېواد ته ولېږه. په دغه پلاوي کې یو روزونکی او څلور لوبغاړي شامل دي.
د افغانستان د کرېکټ بورډ ادارې د شنبې په ورځ، د یوې خبرپاڼې په خپرولو سره ویلي، چې ملي روزونکی نورز منګل، او د ملي لوبډلې لوبغاړي قیس احمد، ظاهرخان پکتین، فیصل شینوزاده او واحدالله ځدراڼ یې په چین کې د کرېکټ د پراختیا او تخینکي همکاریو لپاره یاد هېواد ته ولېږل.
په خبرپاڼه کې د کرېکټ بورډ رییس نصیب خان له قوله راغلي، چې افغانستان د کرېکټ پراختیا ته ژمن دی او هیله لري چې له چین سره د سوداګریزو اړیکو ترڅنګ د کرېکټ په ډګر کې هم تجربي شریکې کړي.
د کرېکټ بورډ د معلوماتو لهمخې، افغان پلاوی به په دغه سفر کې په ټولنه کې د کرېکټ پر ښکېلتیا او مثبتې بوختیا خبرې وکړی، په بېلابېلو ورکشاپونو کې به ګډون وکړي او د ورزشي ټکنالوژۍ له نندارتونونو څخه به لیدنې ترڅنګ به افغان لوبغاړی د چین د کرېکټ مسولینو له لوري په یوه تنظیم شوې لوبه کې هم برخه واخلي.
