په کابل کې د ویلچېر باسکټبال سیالۍ پیل شوي
د طالبانو تر چتر لاندې د اولمپیک، بدني روزنې او سپورټ عمومي ریاست وایي، کابل کې د اته غوره لوبډلو ترمنځ د پارالمپیک فدراسیون په همکارۍ د ویلچېر باسکټبال سیالۍ پیل شوې دي.
ددغه ریاست له خوا په خپره شوې خبرپاڼه کې راغلي، دغه سیالۍ د «سره میاشت» په ورزشي جمنازیم کې ترسره کېږي، چې د هرات، فاریاب، بلخ، بدخشان، ننګرهار، پروان، لغمان او کابل ولایتونو څخه پکې شاوخوا ۸۰ لوبغاړي برخه اخلي. ټاکل شوې دغه سیالۍ درې ورځې دوام وکړي.
په خبرپاڼه کې راغلي، په لومړۍ لوبه کې د کابل ټیم وکولای شول د فاریاب ټیم ته د ۴۹ پر ۳۳ نمرې په توپیر ماتې ورکړي او د سیالیو لومړۍ بریا خپله کړي.
د سپورټ مسوولین وایي، د دې سیالیو موخه د معلولینو هڅول، د هغوی د سپورتي ګډون پراخول او د ټولنې په سپورتي فعالیتونو کې د هغوی د رول پیاوړتیا ده.
