کراچۍ کې ښځې اوس هم د تاوتریخوالي ښکار دي؛ په څلورو میاشتو کې سلګونه پېښې ثبت شوي
د سند ایالت مرکزي ښار کراچۍ د پولیسو د ښځو او ماشومانو د ساتنې مرکز د تازه راپور له مخې، د روان کال له جنورۍ تر اپرېل پورې لږ تر لږه ۳۸۸ ښځې او ۱۰ ماشومان د کورني تاوتریخوالي، ځورونې او جنسي تېري قرباني شوي دي.
د راپور له مخې، تر ټولو ډېرې پېښې د کورنۍ ځورونې دي چې ۲۹۷ شکایتونه ثبت شوي، له دې ډلې یې ۱۹۰ حل شوي او پاتې نورې تر پلټنو لاندې دي.
همداراز د ښځو د ځورونې ۸۳ او د جنسي تېري ۱۹ پېښې هم ثبت شوې دي، چې یو شمېر یې حل شوي خو نورې لا هم ځنډېدلې دي.
چارواکي وايي، دا یوازې رسمي ثبت شوې پېښې دي او ډېری ښځې د وېرې او ټولنیز فشار له امله شکایت نه شي کولای.
