افراسیاب خټک: په بنو کې وروستۍ خونړۍ پېښه د پاکستان د ناکامې امنیتي تګلارې پایله ده
د ملي جمهوري غورځنګ مخکښ او پښتون سیاستوال افراسیاب خټک وایي، په بنو کې وروستۍ خونړۍ برید او د پښتونخوا په جنوبي ولسوالیو کې نورې مرګژوبلې د پاکستان د ترهګرۍ ضد تګلارې ناکامي په ډاګه کوي.
خټک د ایکس په خپل پوسټ کې ویلي، د پاکستان اوسنۍ امنیتي ستراتیژي لا هم د ضیاالحق د دورې پر «ناکامې افغان پالیسۍ» ولاړه ده، هغه تګلاره چې د ده په وینا خپلې پایلې یې له لاسه ورکړې دي.
هغه زیاته کړې، تر هغو چې پاکستان افغانستان د خپل نفوذ یا «ساتندویه قلمرو» په توګه د بدلولو هڅې ونه دروي، په سیمه کې د دوامدارې سولې امکان به محدود پاتې وي.
