روبيو له قطري لومړي وزیر سره پر امنیتي همکاریو او د منځني ختیځ پر ثبات خبرې کړې دي
د امریکا د بهرنیو چارو وزیر مارکو روبيو د قطر له لومړي وزیر او د بهرنیو چارو له وزیر محمد بن عبدالرحمن آل ثاني سره په لیدنه کې د دوه اړخیزو اړیکو، دفاعي همکاریو او د منځني ختیځ د امنیتي وضعیت په اړه خبرې کړې دي.
د امریکا د بهرنیو چارو وزارت په یوه خبرپاڼه کې ویلي، چې دغه لیدنه کې روبيو د بېلابېلو مسایلو په برخه کې د قطر له همکارۍ مننه څرګنده کړې ده.
په خبرپاڼه کې ویل شوي، دواړو لورو د قطر د دفاعي ملاتړ، د ګډو امنیتي ګواښونو د مخنیوي او د سیمې د ثبات او امنیت د ټینګښت لپاره د نږدې همغږۍ پر دوام ټینګار کړی دی.
د امریکا د بهرنیو چارو وزارت ویلي، چې واشنګټن او دوحه غواړي د منځني ختیځ د امنیت او ثبات لپاره خپلې ګډې هڅې لا پیاوړې کړي.
