سیاسي شنونکی بهارات دوګرا په یوه تحلیلي لیکنه کې ویلي، افغانستان چې لسیزو جګړو، بهرنیو لاسوهنو او کورنیو شخړو سخت ځپلی، یوازې د لنډمهاله سیاسي تړونونو له لارې نه شي کولای رښتینې او دوامداره سولې ته ورسېږي.
د دوګرا په وینا، د افغانستان ترڅنګ د سوډان، سویلي سوډان، روانډا او کانګو تجربې ښيي چې پرته له هر اړخیزې شخړههوارۍ، اوربندونه او سیاسي توافقونه ډېر ژر له منځه تللي او جګړې بیا بله بڼه خپله کړې ده.
دغه شنونکی زیاتوي، د تېرو څو لسیزو جګړو، د بهرنیو ځواکونو حضور او وتلو او د کورنیو اختلافاتو پایله دا وه چې که څه هم د سولې بېلابېل اعلانونه شوي، خو جګړې بیا هم دوام موندلی دی.
نوموړی ټینګار کوي چې رښتینی اوربند د سولې لومړنی او اساسي شرط دی، څو خلک د جګړې له روان فشار څخه خلاص شي او د باور جوړونې لپاره زمینه برابره شي. خو د دې په باور، اوربند باید یوازې لومړی ګام وي، نه وروستۍ موخه.
بهارات وایي، په جګړه ځپلو هېوادونو کې هغه سوله دوام موندلی شي چې ټولې خواوې د یو بل لیدلورو ته درناوی وکړي، د تېرو دښمنیو پر ځای د ګډ راتلونکي پر جوړولو تمرکز وکړي او د هغو کورنیو او بهرنیو عواملو پر وړاندې ودرېږي چې جګړه د خپلو ګټو لپاره ژوندۍ ساتي.
همداراز نوموړی د ټولنیزو اړیکو پیاوړتیا ته ځانګړی اهمیت ورکوي او د رسنیو، ځوانانو، ښځو، دیني عالمانو، هنرمندانو او مدني فعالانو رول مهم بولي، څو د جګړې پر ځای د سولې، زغم او ګډ ژوند پیغام پیاوړی کړي.
په افغانستان کې د ولسي سولې د غورځنګونو د پیاوړتیا غوښتنه هم کېږي. د شنونکي په باور، تر هغو چې ولس خپله د سولې غوښتونکی او ساتونکی نه شي، هر ډول سیاسي توافق به له ګواښ سره مخ وي.
نوموړی زیاتوي، که څه هم ځینې ژور اختلافات ښايي ژر حل نه شي، خو جګړه ځپلي هېوادونه کولای شي د عملي سولې پر لور حرکت وکړي، داسې سوله چې خلک یې د خپل وجدان له مخې ومني، ملاتړ یې وکړي او د راتلونکو نسلونو لپاره یې وساتي.
