پوتین وايي فکر کوي چې له اوکراین سره یې جګړه د پای ته رسېدو په حال کې ده
د روسیې ولسمشر د شنبې په ورځ وویل، دی فکر کوي چې د اوکراین جګړه پای ته رسېدونکې ده. دغه څرګندونې یوازې څو ساعته وروسته له هغې وشوې چې نوموړي په مسکو کې د «بریا ورځې» په مراسمو کې په اوکراین کې د بریا ژمنه وکړه؛ دا مراسم د تېرو څو کلونو پر تله په محدود ډول ترسره شول.
د رویټرز د راپور لهمخې، پوتین خبریالانو ته د روسیې او اوکراین د جګړې په اړه، چې له دویمې نړیوالې جګړې وروسته په اروپا کې تر ټولو خونړۍ شخړه ده، وویل: «زه فکر کوم چې دا موضوع (جګړه) پای ته رسېدونکې ده.» هغه دا هم وویل، چې چمتو دی د اروپا لپاره پر نویو امنیتي ترتیباتو خبرې وکړي او زیاته یې کړه، چې د ده د خوښې خبرو اترو شریک به د جرمني پخوانی لومړی وزیر ګرهارډ شرودر وي.
کرملین ویلي، چې د امریکا د ولسمشر ډونالډ ټرمپ د ادارې په منځګړیتوب له اوکراین سره د سولې خبرې اترې ځنډول شوې دي. پوتین په وار وار ژمنه کړې، چې تر هغه وخته به جګړې ته دوام ورکړي، چې د روسیې بېلابېل جنګي اهداف ترلاسه شوي نه وي.
دا په داسې حال کې ده، چې دمګړۍ د دواړو لورو تر منځ لنډ مهالی اوربند د بندیانو د تبادلې لپاره عملي شوی دی.
