د غزې روغتیايي چارواکي وایي، د اسراییلو په تازه هوايي بریدونو کې لږ تر لږه درې فلسطینیان وژل شوي، چې د حماس تر ادارې لاندې د پولیسو د جنايي څانګې یو لوړپوړی مسوول او د هغه مرستیال هم پکې شامل دي.
د رویټرز د راپور له مخې، دغه بریدونه د امریکا په منځګړیتوب د شوي اوربند د نازک وضعیت په اړه اندېښنې لا زیاتوي، ځکه په غزه کې له اوربند سره سره تاوتریخوالی لا هم دوام لري.
روغتیايي سرچینو ویلي، یو برید د غزې د المغازي کډوالو په کمپ کې شوی چې له امله یې یو کس وژل شوی، او بل برید د خانیونس په ښار کې د حماس تر ادارې لاندې د جنايي پولیسو مشر وسام عبدالهادي او د هغه مرستیال په نښه کړي دي.
تر اوسه د اسراییلو پوځ د دغو بریدونو په اړه څه نه دي ویلي، خو رویټرز مخکې راپور ورکړی و چې اسراییلو په وروستیو کې د غزې د حماس تر ادارې لاندې د پولیسو پر مرکزونو خپل بریدونه زیات کړي دي.
په راپور کې ویل شوي چې که څه هم د ۲۰۲۵ کال په اکتوبر کې اوربند اعلان شوی، خو اسراییلي بریدونه نږدې هره ورځ دوام لري.
د غزې د روغتیايي ادارو د معلوماتو له مخې، د اوربند له پیل راهیسې تر اوسه لږ تر لږه ۸۵۰ فلسطینیان وژل شوي، په داسې حال کې چې اسراییل وایي په همدې موده کې وسلهوالو د دوی څلور سرتېري وژلي دي.
اسراییل او حماس دواړه یو بل د اوربند په نقض تورنوي. د غزې روغتیايي چارواکي وایي، د ۲۰۲۳ کال د اکتوبر له جګړې راهیسې تر اوسه له ۷۲ زرو او ۵۰۰څخه زیات فلسطینیان وژل شوي چې ډېری یې ملکي وګړي دي.
