ټرمپ د سولې وړاندیز په ځواب کې د ایران غوښتنې په چټکۍ رد کړې
ټرمپ د امریکا د سولې وړاندیز ته د ایران ورکړل شوی ځواب په چټکۍ رد کړی. ایران ویلي چې جګړه باید په ټولو جبهو کې پای ته ورسېږي او امریکا د جګړې د زیانونو جبران ور کړي. تهران په هرمز تنګي کې پر خپل حاکمیت ټینګار کړی او له امریکا یې غوښتي چې سمندري بندیز پای ته ورسوي.
خو ټرمپ د ایران دا وړاندیز «په بشپړه توګه د نه منلو وړ» وباله او رد یې کړ.
د راپورونو له مخې، د امریکا وړاندیز دا و چې لومړی جګړه ودرول شي او وروسته د ایران د اټومي پروګرام په ګډون پر نورو ناندریزو موضوعاتو خبرې وشي.
ایراني چارواکو بیا د خپل دریځ دفاع کړې او ویلي یې دي چې د جګړې پای، د امریکا د بندیزونو ختمېدل او د کنګل شویو ایراني شتمنیو ازادول ددوی روا غوښتنې دي.
