د طالبانو لهخوا له دندې ګوښه شوې د یوې دولتي ادارې کارکوونکې وایي، چې له تېرو څلورو میاشتو راهیسې اداره په اداره کار پسې لالهانده ګرځي؛ خو لاهم د دندې په پیدا کولو نهده توانېدلې. نوموړې چې د کورنۍ یوازینۍ سرپرسته ده وایي، د ورځنیو لګښتونو پوره کولو وس نهلري.
هغې افغانستان انټرنشنل پښتو ته د نوم نه ښودلو په شرط د یوه غږیر پیغام په لېږلو سره ویلي، چې شاوخوا شل کاله یې په حکومت کې کار کړی؛ خو طالبانو څلور میاشتې وړاندې د کوم لامل پرته له دندې ګوښه کړې.
نوموړې زیاتوي:« د نورو لګښتونو ترڅنګ په کور کې یوه ناروغه خور لرم، چې د درملو اخیستل یې د روغتیا لپاره اړین دي؛ خو زه اوس د هغې د درملو د پېرلو وس هم نهلرم». هغه وایي، که څه هم دولتي تنخواوې کمې وې؛ خو بیاهم دوی پرې ورځني لګښتونه پوره کول؛ خو اوس د عاید د نشتوالي له امله د ورځې اېله یو وخت ډوډۍ خوري.
د هغې په وینا؛ له تېرو څلورو میاشتو راهیسې کار پسې لالهانده اداره په اداره ګرځي، خو د طالبانو لهخوا د ښځو پر کار د لګېدلو بندیزونو او محدودیتونو له امله اوس څوک مېرمنو ته کار نه ورکوي.
