لبنان له امریکا غوښتي چې اسراییل له بریدونو او د کورونو له نړولو را وګرځوي
د لبنان ولسمشر له امریکا غوښتي چې پر اسراییل فشار زیات کړي چې اوربند مراعات وکړي او په جنوبي لبنان کې بریدونه او د کورونو نړول ودروي. د لبنان د روغتیا وزارت ویلي چې یوازې په تېرو درې ورځو کې د اسراییلي بریدونو له امله ۷۴ کسان وژل شوي.
د حزبالله او اسراییل ترمنځ شخړې د مارچ له دویمې نېټې بیا پیل شوې او له هغه وخت راهیسې په ځانګړي ډول په جنوبي لبنان کې دوام لري.
د لبنان ولسمشر جوزف عون له امریکايي سفیر سره په لیدنه کې ټینګار کړی چې پر اسراییل باید فشار راوستل شي څو پوځي عملیات او د کورونو ویجاړول ودروي.
ټاکل شوې چې د لبنان او اسراییل د استازو ترمنځ د خبرو درېیم پړاو په واشنګټن کې ترسره شي، چې موخه یې د کړکېچ کمول دي.
