بقايي: د سیمې ګڼ هېوادونه د کړکېچ زیاتېدو په اړه اندېښمن دي
د ایران د بهرنیو چارو وزارت ویاند اسماعیل بقايي وایي: «په اوسني پړاو کې زموږ تمرکز د جګړې پر پای ته رسولو دی». هغه زیاته کړې: «د اټومي پروګرام او یورانیمو بډایه کولو اړوند مسلو په اړه به د پرېکړې او انتخابونو په تړاو وروسته خبرې وشي».
بقايي زیاته کړې: «ګڼ هېوادونه او په ځانګړې توګه د سیمې هېوادونه له موږ سره اړیکه نیسي، چې دوی د تاوتریخوالي د زیاتوالي په اړه اندېښمن دي. موږ تل د هغو ګوندونو ستاینه کړې، چې په ښه نیت سره هڅه کوي د تاوتریخوالي د رامنځته کولو مخه ونیسي».
هغه پاکستان د تهران او واشنګټن ترمنځ «رسمي منځګړی» وباله او زیاته یې کړه: «د قطر په ګډون نور هېوادونو هم له دواړو خواوو سره اړیکې کې دي او هر هغه نظر چې اړین ګڼي د بهرنیو چارو وزیر سره یې شریکوي».
