مولانا فضل الرحمن: په پاکستان کې هېڅ ډول حکومت شتون نه لري
د پاکستان د جمعيت علمای اسلام ګوند مشر مولانا فضل الرحمن ويلي، په پاکستان کې هېڅ ډول حکومت شتون نه لري او که څه شته هم نو د دوی په سیمو کې «د حکومت هېڅ حاکميت» نشته.
د پاکستان د جمعيت علمای اسلام ګوند مشر مولانا فضل الرحمن ويلي، په پاکستان کې هېڅ ډول حکومت شتون نه لري او که څه شته هم نو د دوی په سیمو کې «د حکومت هېڅ حاکميت» نشته.
د دوشنبې په ورځ د پاکستان پارلمان ته په وينا کې هغه وويل، د خيبرپښتونخوا په سويلي ولسواليو کې «په لرې پرتو سيمو کې په جوماتونو او بېټکونو کې وسله وال موجود دي، څوک له ويرې خپل ماشوم ښوونځي ته نشي لېږلی».
هغه زياته کړه، «په سیمه کې کاروبارونه په ټپه ودرېدلې دي، په لوي شمېر کې خلک کډې کوي خو حکومت په دې هېڅ خبره نه کوي، چې په هېواد کې څه روان دي».
هغه وويل، ډېره اسماعيل، ټانک، لکي مروت او بنو یې سیمې دي، «دغلته کوم سرتيری او نه کوم ملکي وګړی خوندي نه دي».
مولانا فضل الرحمان وويل، «په يوه ورځ د يوه کلي نه هغه سرتيری چې په رخصت وو، سهار له کوره بوتلل شوی، ويډیو یې جوړه شوې او په ډزو وژل شوی، او هم د دغه کلي نه ماسپښين بل تن بوتلل شوی او د ماښام نه وړاندې د هغه جسد ترلاسه کړل شوی دی».
په وروستيو کې د خيبرپښتونخوا په سويلي ولسواليو او قبايلي سيمو کې د ناامنۍ پېښو بیا زور نيولی دی.
