د بلوچستان کوټې ښار ته نږدې پر مستونګ لویه لاره په لاک پاس سیمه کې د ګمرک په یوه ګودام کې سخت اور لګېدلی، چې لږترلږه ۴۵ کسان یې ټپیان کړي او تر ۱۰۰ ډېر موټرونه یې سوځولي دي. که څه هم له یادې اورلګېدنې ۲۳ ساعته تېرېږي؛ خو لاهم اور نهدی کابو شوی.
د بلوچستان ځایي چارواکي وایي، په ټپیانو کې پنځه امنیتي سرتېري هم شامل دي او د ځینو روغتیايي وضعیت نازک ښودل شوی دی. د چارواکو په وینا؛ ټپیان د کوټې بېلابېلو روغتونونو ته لېږدول شوي او په ښار کې بېړنی روغتیايي حالت اعلان شوی دی.
د راپورونو له مخې؛ په ګودام کې د ګاز ډبې، سون توکو او کیمیاوي توکو شتهوالي د اور شدت لا زیات کړی دی. د ژغورنې عملیاتو پرمهال د ګاز یوه ټانکره هم چاودلې، چې پهکې څو لوړپوړي چارواکي برسېرن ټپیان شوي دي.
د بلوچستان ځایي چارواکو د یادې اورلګېدنې له امله د کوټې ـ کراچۍ او کوټې ـ نوشکي لویې لارې د تګراتګ لپاره تړلې دي، چې د ژغورنې عملیاتو تر بشپړېدو وروسته به بېرته د تګراتګ لپاره پرانیستل شي.
