د هند لومړی وزیر په پنځه ورځني سفر پنځو هېوادونو ته ځي
د هند لومړی وزیر نریندرا مودي د مې له ۱۵مې تر ۲۰مې پورې د پنځو هېوادونو سفر پیلوي. د هند د بهرنیو چارو وزارت ویلي، مودي به لومړی د مې پر ۱۵مه متحده عربي اماراتو ته ولاړ شي او وروسته به هالنډ، سویډن، ناروې او ایټالیا ته سفر وکړي.
دا سفر په داسې حال کې کېږي چې د منځني ختیځ کړکېچ د نفتو نړیوال قیمتونه لوړ کړي دي.
تر دې وړاندې مودي د انرژۍ د سپما، د وارداتو او د سرو زرو د پېر کمولو او همداراز د سفرونو د محدودولو غوښتنه کړې وه، څو د هېواد پر اقتصادي وضعیت فشار راکم شي.
